Croeso

Croeso i TermCymru - y gronfa derminoleg sy'n cael ei chynnal a'i chadw gan Wasanaeth Cyfieithu Llywodraeth Cynulliad Cymru.

Cefndir

Casgliad yw TermCymru o'r termau y bydd cyfieithwyr y Cynulliad yn eu defnyddio yn eu gwaith bob dydd. Caiff ei ddiweddaru'n rheolaidd ac mae'n tyfu'n raddol yn gronfa helaeth o dermau safonol a chyfoes. Nid cronfa hollgynhwysfawr ac awdurdodol mohoni - y nod yw cofnodi'r termau a ddefnyddir gan y cyfieithwyr yn y gwahanol feysydd y mae'r Cynulliad yn ymdrin â hwy. Mae hefyd yn cynnwys enwau llawer o gynlluniau a rhaglenni Llywodraeth Cynulliad Cymru, ynghyd â theitlau nifer o'r dogfennau a gyhoeddwyd gan Lywodraeth Cynulliad Cymru a chan gyrff eraill. Wrth gyhoeddi'r casgliad ar y we, y gobaith yw y bydd o ddefnydd nid yn unig i gyfieithwyr, ond i unrhyw un sy'n ymdrin â therminoleg wrth weithio mewn hinsawdd ddwyieithog.

Cronfa Saesneg-Cymraeg yw TermCymru yn wreiddiol; ni nodwyd rhannau ymadrodd ac ati ar gyfer y termau Saesneg. Serch hynny, mae modd chwilio o'r Gymraeg i'r Saesneg yn ogystal ag fel arall.

Sylwer nad yw'r holl dermau yn y gronfa wedi'u safoni. Er mwyn dangos hynny, rhoddwyd statws i bob term, yn amrywio o statws 5 (yr isaf) i statws 1 (yr uchaf). Ar ôl i derm gael ei drafod a'i gymeradwyo, caiff y statws ei godi. Mae'n bwysig ystyried statws pob term cyn ei ddefnyddio.